حدیقہ کیانی کو فن موسیقی میں نمایاں خدمات پر ستارہ امتیاز سے نوازا گیا

گورنر ہاؤس لاہور میں بدھ کے روز منعقدہ ایک پروقار تقریب میں گورنر پنجاب سردار سلیم حیدر نے صدرِ پاکستان کی جانب سے معروف پاکستانی گلوکارہ حدیقہ کیانی کو موسیقی کے شعبے میں ان کی گراں قدر خدمات کے اعتراف میں ’ستارہ امتیاز‘ سے نوازا۔حدیقہ کیانی نے اپنے آفیشل انسٹاگرام اکاؤنٹ پر ایوارڈ وصول کرنے کی ویڈیو اور تصاویر شیئر کرتے ہوئے اپنی خوشی کا اظہار کیا۔ انہوں نے لکھا کہ وہ اس اعزاز کے حصول پر بے حد فخر اور عاجزی محسوس کر رہی ہیں۔ گلوکارہ کے لیے یہ لمحہ اس لیے بھی خاص تھا کہ انہیں 20 سال قبل ’تمغہ امتیاز‘ سے نوازا گیا تھا، اور اب دو دہائیوں بعد انہیں ملک کا یہ تیسرا بڑا سول اعزاز (ستارہ امتیاز) حاصل ہوا۔ حدیقہ کیانی نے اپنی کامیابی کا سہرا اپنے بیٹے، خاندان، مداحوں اور ان تمام لوگوں کے سر باندھا جو برسوں سے ان کے فنی سفر کا حصہ رہے ہیں۔ انہوں نے کہا، “میں دل کی گہرائیوں سے شکر گزار ہوں کہ آپ سب کے ساتھ یہ سفر آج بھی کامیابی سے جاری ہے۔”گلوکارہ نے ایک دلچسپ مشاہدہ بھی شیئر کیا کہ 20 سال قبل جب انہیں ’تمغہ امتیاز‘ ملا تھا، تب بھی انہوں نے سرخ لباس زیب تن کر رکھا تھا اور اس بار ستارہ امتیاز وصول کرتے وقت بھی وہ اتفاقاً سرخ لباس ہی پہنے ہوئے تھیں۔ انہوں نے اس اتفاق کو اپنے فنی سفر کی ایک خوبصورت علامت قرار دیا۔