گل پلازہ آتشزدگی: بلڈنگ میں آگ بجھانے کے آلات، ہنگامی اخراج کے انتظامات نہیں تھے، رپورٹ

کراچی: گل پلازہ میں لگنے والی آگ سے متعلق حکام کی رپورٹ سامنے آگئی ہے، جس میں سنگین حفاظتی کوتاہیوں کی نشاندہی کی گئی ہے۔
رپورٹ کے مطابق گل پلازہ میں ہنگامی اخراج کی جگہ موجود نہیں تھی اور عمارت میں آگ بجھانے کے انتظامات بھی ناکافی تھے، جس کے باعث تنگ داخلی و خارجی راستوں کی وجہ سے فائر فائٹنگ میں تکنیکی مشکلات کا سامنا کرنا پڑا۔
رپورٹ میں بتایا گیا کہ 1995 میں تعمیر ہونے والی یہ عمارت ابتدائی طور پر بیسمنٹ، گراؤنڈ اور پہلی منزل تک محدود تھی، جبکہ 2003 تک مختلف اوقات میں تین اضافی فلورز تعمیر کیے گئے۔
عمارت میں دکانوں کی تعداد 500 سے بڑھ کر 1200 ہو گئی تھی، جس سے آگ کے پھیلاؤ اور انتظامی مشکلات میں اضافہ ہوا۔
گل پلازہ میں ہفتے کی رات سوا 10 بجے کے قریب گراؤنڈ فلور پر آگ لگی، جو تیزی سے تیسری منزل تک پہنچ گئی۔ اس حادثے میں چھ افراد جاں بحق اور عمارت کے کئی حصے شدید نقصان کا شکار ہوئے۔