کراچی: گل پلازہ کے بعد رمپا پلازہ بھی غیر محفوظ قرار

کراچی میں گل پلازہ میں آتشزدگی کے واقعے کے بعد سندھ بلڈنگ کنٹرول اتھارٹی نے ملحقہ رمپا پلازہ کو بھی غیر محفوظ قرار دے دیا ہے۔

ایس بی سی اے کے مطابق گل پلازہ کے ملبے سے رمپا پلازہ کے ستون متاثر ہوئے ہیں، جس کے باعث عمارت کے خطرناک حصوں کو سیل کر دیا گیا ہے۔ ادارے نے رمپا پلازہ کی انتظامیہ اور دکان مالکان کو نوٹس جاری کرتے ہوئے ہدایت دی ہے کہ خطرناک حصوں کا کسی بھی صورت استعمال نہ کیا جائے۔

اتھارٹی نے واضح کیا ہے کہ رمپا پلازہ میں کسی بھی غیر قانونی یا غیر اجازت شدہ سرگرمی پر سخت ایکشن لیا جائے گا۔

دوسری طرف سانحہ گل پلازہ میں مزید تین لاشوں کی شناخت کے بعد شناخت شدہ لاشوں کی تعداد 11 ہو گئی ہے، جبکہ مجموعی طور پر 28 افراد جاں بحق ہو چکے ہیں۔ 17 لاشیں تاحال ناقابل شناخت ہیں اور 50 خاندانوں کے ڈی این اے نمونے حاصل کر لیے گئے ہیں۔

ریسکیو ذرائع کے مطابق فائر فائٹرز اور ریسکیو ٹیمیں تیسری منزل تک پہنچ چکی ہیں، جبکہ پہلی اور دوسری منزل کو پہلے ہی کلیئر کیا جا چکا ہے۔ جلد ہی ملبہ ہٹانے کا عمل تیز کیا جائے گا۔