کراچی: گل پلازا کی آگ پر قابو پالیا گیا، کولنگ کا عمل جاری، جاں بحق افراد کی تعداد 14 ہوگئی

کراچی: گل پلازا میں لگنے والی آگ 33 گھنٹے بعد مکمل طور پر بجھا دی گئی ہے، تاہم کولنگ کا عمل تاحال جاری ہے۔ جلی ہوئی عمارت سے مزید چار افراد کی لاشیں نکال لی گئی ہیں جس کے بعد جاں بحق افراد کی تعداد 14 ہو گئی ہے، جبکہ 22 زخمی مختلف اسپتالوں میں زیر علاج ہیں۔

چیف فائر آفیسر کے مطابق پلازا میں کولنگ کا عمل جاری ہے، کٹر کی مدد سے کھڑکیوں کو کاٹا جا رہا ہے جبکہ ہتھوڑوں کی مدد سے بعض دیواریں بھی گرائی جا رہی ہیں تاکہ اندر پھنسے افراد تک رسائی حاصل کی جا سکے۔

ریسکیو حکام کا کہنا ہے کہ پلازا کی تیسری منزل پر کسی شخص کے پھنسے ہونے کے امکان پر اتوار کی رات فائر فائٹرز عمارت کے اندر داخل ہونے میں کامیاب ہوئے۔

جلی ہوئی دکانوں میں محدود سرچ آپریشن کیا گیا، اس دوران ریسکیو ورکرز نے صدائیں لگا کر زندگی کی تلاش کی اور جائے حادثہ پر تھرمل کیمرے نصب کیے گئے۔ سرچ آپریشن کے دوران ایک بچے سمیت تین افراد کے اعضا بھی ملے، جنہیں سول اسپتال کے ٹراما سینٹر منتقل کر دیا گیا ہے۔

پولیس کے مطابق لاپتہ افراد کے اہل خانہ سے موبائل نمبرز حاصل کر لیے گئے ہیں، اور 20 سے زائد افراد کے فونز کی آخری لوکیشن گل پلازا کے اطراف ظاہر ہو رہی ہے۔