ڈیزل سستا ہونے کے بعد گڈز ٹرانسپورٹ کے کرایوں میں 10 فیصد کمی

لاہور: حکومت کی جانب سے پٹرولیم مصنوعات کی قیمتوں میں نمایاں کمی کے بعد لاہور میں گڈز اور پبلک ٹرانسپورٹرز نے کرایوں میں 10 فیصد تک کمی کا بڑا اعلان کر دیا ہے، جس سے عوام اور تاجر برادری کو نقل و حمل کے اخراجات میں فوری ریلیف ملے گا۔

لاہور میں پاکستان منی مزدا و گڈز ٹرانسپورٹ ایسوسی ایشن کے صدر حاجی شیر علی نے دیگر عہدیداروں کے ہمراہ پریس کانفرنس کرتے ہوئے کہا کہ ڈیزل کی قیمتوں میں کمی کے بعد ٹرانسپورٹرز نے اس کے ثمرات براہِ راست عوام اور کاروباری طبقے تک پہنچانے کا فیصلہ کیا ہے۔ انہوں نے کہا کہ حکومت کا یہ اقدام خوش آئند ہے، اسی تناظر میں مزدا اور گڈز ٹرانسپورٹ کے کرایوں میں فوری طور پر 10 فیصد کمی کی جا رہی ہے۔

دوسری جانب پبلک ٹرانسپورٹ مالکان اور تنظیموں نے بھی مسافر گاڑیوں اور بسوں کے کرایوں میں 10 فیصد کمی کا اعلان کر دیا ہے۔ ٹرانسپورٹ ایسوسی ایشن کے رہنماؤں کا کہنا ہے کہ پٹرول اور ڈیزل کے نرخوں میں کمی کے بعد کرایوں میں نوٹیفائیڈ روٹ کے مطابق ردو بدل کر دیا گیا ہے، جس سے دور دراز کا سفر کرنے والے مسافروں کو بھی مالی راحتی فراہم ہوگی۔

شہریوں اور تاجر برادری نے کرایوں میں کمی کا خیرمقدم کرتے ہوئے صوبائی اور مقامی انتظامیہ سے مطالبہ کیا ہے کہ تمام نجی و سرکاری بس اڈوں اور مال بردار گاڑیوں کے پرائم روٹس پر نئے کرایہ ناموں پر مکمل عملدرآمد یقینی بنایا جائے۔