عالمی و مقامی سطح پر سونے چاندی کی قیمتوں میں اضافہ

عالمی مارکیٹ میں قیمتوں میں لہر کے ساتھ ہی مقامی صرافہ بازاروں میں بھی سونے اور چاندی کے نرخوں میں سنسنی خیز اضافہ ریکارڈ کیا گیا ہے۔ آل پاکستان صرافہ ایسوسی ایشن کے مطابق 24 قیراط فی تولہ سونے کی قیمت میں 13,900 روپے کا نمایاں اضافہ ہوا ہے، جس کے بعد اس کا بھاؤ 4 لاکھ 26 ہزار 36 روپے کی بلند ترین سطح پر پہنچ گیا ہے، جبکہ 10 گرام سونے کی قیمت 11,917 روپے اضافے کے ساتھ 3 لاکھ 65 ہزار 257 روپے ہو گئی ہے۔ اسی طرح 24 قیراط فی تولہ چاندی کا نرخ 295 روپے بڑھ کر 5,663 روپے پر جا پہنچا ہے۔ صرافہ ایسوسی ایشن کے مطابق مقامی مارکیٹ میں اس تیزی کی بنیادی وجہ عالمی منڈی میں فی اونس سونے کی قیمت میں 139 ڈالر کا غیر معمولی اضافہ ہے، جس سے عالمی قیمت 4,035 ڈالر فی اونس ہو گئی ہے۔