پاکستان میں سونے کی قیمت میں بڑی کمی

ملک بھر میں کاروباری ہفتے کے تیسرے روز بھی سونے کی قیمت میں بڑی کمی ریکارڈ کی گئی ہے۔ بین الاقوامی بلین مارکیٹ میں سونے کی فی اونس قیمتوں میں آنے والی تنزلی کے براہِ راست اثرات کے باعث ملکی صرافہ مارکیٹوں میں بھی سونے کی قیمتوں میں مسلسل کمی دیکھی گئی ہے۔

آل پاکستان جیمز اینڈ جیولرز صرافہ ایسوسی ایشن کی جانب سے جاری کردہ تازہ اعداد و شمار کے مطابق آج ملک میں 24 قیراط کے فی تولہ سونے کی قیمت میں 1,800 روپے کی نمایاں کمی ریکارڈ کی گئی، جس کے بعد فی تولہ سونا 4 لاکھ 53 ہزار 936 روپے کی سطح پر آ گیا ہے۔ اسی طرح 10 گرام سونے کی قیمت 1,544 روپے کی کمی کے بعد 3 لاکھ 89 ہزار 176 روپے مقرر کی گئی ہے، جبکہ فی تولہ چاندی کی قیمت میں 30 روپے کی کمی ریکارڈ ہوئی جس کے بعد اس کا نیا بھاؤ 7,008 روپے ہو گیا ہے۔

دوسری جانب بین الاقوامی مارکیٹ میں فی اونس سونے کی قیمت 18 ڈالر کی کمی کے بعد 4,314 ڈالر کی سطح پر آ گئی ہے، جس کی بدولت مقامی مارکیٹ میں بھی قیمتیں مزید نیچے آئیں۔