سونے کی قیمت میں مسلسل پانچویں روز بھی کمی کا رجحان برقرار

عالمی اور مقامی صرافہ منڈیوں میں سونے کی قیمتوں میں مسلسل پانچویں روز بھی کمی کا سلسلہ جاری رہا، جس کے باعث سونا 5 ماہ کی کم ترین سطح پر آ گیا ہے۔ آل صرافہ ایسوسی ایشن کے مطابق مقامی صرافہ بازاروں میں 24 قیراط فی تولہ سونے کی قیمت میں 2 ہزار 500 روپے کی کمی ہوئی، جس سے فی تولہ سونا 4 لاکھ 22 ہزار 36 روپے کا ہو گیا۔ اسی طرح 10 گرام سونا 2 ہزار 144 روپے سستا ہو کر 3 لاکھ 61 ہزار 686 روپے پر آ گیا، جبکہ فی تولہ چاندی کی قیمت بھی 7 روپے کمی سے 5 ہزار 858 روپے ریکارڈ کی گئی۔ عالمی مارکیٹ میں فی اونس سونا 25 ڈالر کی گراوٹ کے بعد 4 ہزار ڈالر کی اہم نفسیاتی سطح سے نیچے گر کر 3 ہزار 995 ڈالر فی اونس پر بند ہوا، جس کے باعث سرمایہ کار آئندہ کے رجحانات کا جائزہ لے رہے ہیں۔