سونے کی قیمت میں بڑا اضافہ، فی تولہ 4 لاکھ 57 ہزار سے متجاوز

عالمی اور مقامی صرافہ مارکیٹوں میں سونے اور چاندی کی قیمتوں میں ایک بار پھر شدید اور نمایاں اضافہ ریکارڈ کیا گیا ہے۔ ملکی صرافہ مارکیٹ میں 24 قیراط فی تولہ سونے کی قیمت میں ایک ہی دن میں 7 ہزار 900 روپے کا بڑا اضافہ ہوا، جس کے بعد فی تولہ سونا تاریخ کی نئی بلند ترین سطح 4 لاکھ 57 ہزار 236 روپے پر پہنچ گیا ہے۔

اسی طرح 10 گرام سونے کی قیمت میں بھی 6 ہزار 773 روپے کا نمایاں اضافہ دیکھا گیا، جس کے نتیجے میں 10 گرام سونا 3 لاکھ 92 ہزار 6 روپے کی سطح پر پہنچ گیا۔ عالمی بلین مارکیٹ میں بھی سونے کی قیمتوں میں تیزی کی لہر برقرار رہی، جہاں فی اونس سونا 79 ڈالر کے وادھے کے بعد 4 ہزار 347 ڈالر فی اونس کی ریکارڈ سطح پر بند ہوا۔

دوسری جانب سونے کے ساتھ ساتھ چاندی کے بھاؤ میں بھی تیز پیشرفت دیکھنے کو ملی ہے۔ 24 قیراط فی تولہ چاندی کی قیمت میں 140 روپے کا اضافہ ہوا، جس کے بعد مقامی مارکیٹ میں چاندی کی فی تولہ قیمت بڑھ کر 6 ہزار 942 روپے کی سطح پر آ گئی۔ معاشی ماہرین کے مطابق بین الاقوامی سطح پر مالیاتی خدشات اور کرنسی مارکیٹ کے اتار چڑھاؤ کی وجہ سے قیمتی دھاتوں کے نرخ مسلسل بڑھ رہے ہیں۔