اسرائیل کے ساتھ مذاکرات پر کوئی اعتراض نہیں، مذاکرات جنگ کا متبادل ہیں: جبران باسیل

لبنان کے سابق وزیر خارجہ اور معروف سیاستدان جبران باسیل نے کہا ہے کہ انہیں اصولی طور پر اسرائیل کے ساتھ مذاکرات پر کوئی اعتراض نہیں ہے، کیونکہ مذاکرات ہمیشہ جنگ کا متبادل ہوتے ہیں۔

قطری نشریاتی ادارے ‘الجزیرہ’ سے گفتگو کرتے ہوئے جبران باسیل نے واضح کیا کہ لبنان کو کسی بیرونی فریق پر انحصار کرنے کے بجائے اپنے حقوق کے لیے خود مذاکرات کرنے چاہئیں اور کسی دوسرے ملک کو لبنان کی نمائندگی کا حق نہیں ہونا چاہیے۔ انہوں نے مؤقف اختیار کیا کہ اسرائیل کے ساتھ کسی بھی مذاکراتی عمل کی حمایت صرف اسی صورت ممکن ہے جب اس کے ذریعے لبنانی عوام کے حقوق بحال ہوں، خطے میں پائیدار امن قائم ہو، اور کوئی بھی حتمی معاہدہ لبنان کے لیے ہتھیار ڈالنے کی دستاویز ثابت نہ ہو۔

سابق وزیر خارجہ نے موجودہ فریم ورک معاہدے پر کڑی تنقید کرتے ہوئے دعویٰ کیا کہ اس کے نتیجے میں حزب اللہ کی جانب سے فراہم کیا جانے والا دفاعی تحفظ تو ختم ہو گیا ہے لیکن اس کا کوئی متبادل پیش نہیں کیا گیا۔ ان کے مطابق، یہ معاہدہ شکل اور مواد دونوں اعتبار سے ناقص ہے کیونکہ اس میں لبنان پر تو متعدد ذمہ داریاں اور پابندیاں عائد کی گئی ہیں مگر اسرائیل پر کوئی واضح ذمہ داری نہیں ڈالی گئی۔

جبران باسیل نے خبردار کرتے ہوئے مزید کہا کہ اسرائیل اس صورتحال کا فائدہ اٹھا کر لبنانی فوج اور حزب اللہ کے درمیان تصادم اور خانہ جنگی کی فضا پیدا کرنا چاہتا ہے، جس سے ملک کو بچانے کی ضرورت ہے۔