شکارپور میں ٹول ٹیکس تنازع پر بس ڈرائیور نے ملازم کو کچل دیا

انڈس ہائی وے پر قائم ٹول ٹیکس پلازہ پر ٹول ٹیکس کی وصولی کے دوران ایک افسوسناک اور خونریز واقعہ پیش آیا ہے، جہاں ایک بے رحم بس ڈرائیور نے ٹول عملے کو گاڑی سے کچل دیا، جس کے نتیجے میں ایک ملازم موقع پر ہی جاں بحق ہو گیا۔

پولیس کے مطابق واقعے میں جاں بحق ہونے والے ٹول ملازم کی شناخت علی رضا شر کے نام سے ہوئی ہے۔ ٹول ٹیکس مانگنے پر بس ڈرائیور نے مبینہ طور پر گاڑی ملازم پر چڑھا دی اور واقعے کے بعد بس موقع پر ہی چھوڑ کر فرار ہو گیا۔ اطلاع ملتے ہی پولیس نے موقع پر پہنچ کر لاش کو ضروری قانونی کارروائی اور پوسٹ مارٹم کے لیے ہسپتال منتقل کیا اور واقعے کی تحقیقات کا آغاز کر دیا۔

پولیس حکام کا کہنا ہے کہ فرار بس ڈرائیور کی گرفتاری کے لیے علاقے کی ناکہ بندی کر دی گئی ہے اور مختلف ممکنہ مقامات پر چھاپے مارے جا رہے ہیں۔ دوسری جانب جاں بحق ملازم کے لواحقین نے شدید غم و غصے کا اظہار کرتے ہوئے حکام سے مطالبہ کیا ہے کہ ملزم کو فوری گرفتار کر کے قانون کے مطابق سخت سے سخت سزا دی جائے۔ پولیس نے یقین دہانی کرائی ہے کہ واقعے کے تمام پہلوؤں کی تفتیش جاری ہے اور ملزم کو جلد از جلد قانون کے کٹہرے میں لایا جائے گا۔