سرکاری کالجز میں نرسنگ کی مفت تعلیم ختم کردی گئی

پنجاب حکومت نے سرکاری نرسنگ کالجز میں مفت تعلیم کا خاتمہ کرتے ہوئے نئی داخلہ پالیسی جاری کر دی ہے، جس کے تحت اب نرسنگ طالبات ہزاروں روپے فیس ادا کرکے تعلیم حاصل کریں گی۔ حکومت نے نرسنگ طالبات کو دیا جانے والا ماہانہ وظیفہ بھی ختم کر دیا ہے، جبکہ سرکاری ہاسٹلز کے واجبات بھی طالبات کو خود ادا کرنا ہوں گے۔

جاری کردہ پالیسی کے مطابق نرسنگ کالجز میں داخلے کے لیے ایف ایس سی میں کم از کم 50 فیصد نمبرز ہونا لازمی قرار دیا گیا ہے، جبکہ صرف پنجاب ڈومیسائل رکھنے والی طالبات ہی داخلے کی اہل ہوں گی۔

پالیسی کے تحت شاہدرہ ٹیچنگ ہسپتال کے نرسنگ کالج میں صرف مرد طلبا کو داخلہ دیا جائے گا۔ سرکاری نرسنگ کالجز میں مجموعی طور پر 3100 نشستیں مارننگ شفٹ اور 3000 نشستیں ایوننگ شفٹ میں مختص کی گئی ہیں۔ ٹیچنگ ہسپتالوں سے منسلک نرسنگ کالجز میں 100، 100 نشستیں جبکہ ڈسٹرکٹ ہسپتالوں سے منسلک کالجز میں دونوں شفٹوں کے لیے 50، 50 نشستیں مختص کی گئی ہیں۔

نئی پالیسی کے نفاذ کے بعد نرسنگ کے شعبے میں تعلیم حاصل کرنے کے خواہشمند طلبہ و طالبات پر مالی بوجھ میں اضافہ متوقع ہے۔