بھارتی سٹاک مارکیٹ میں عالمی سرمایہ کاری 17 سال کی کم ترین سطح پر پہنچ گئی

عالمی جریدے ‘بلوم برگ’ کی تازہ ترین رپورٹ کے مطابق نریندر مودی کی قیادت میں بھارتی حکومت کی ناکام معاشی پالیسیوں کے باعث غیر ملکی سرمایہ کاروں کا بھارتی سٹاک مارکیٹ پر اعتماد ختم ہو گیا ہے۔ عالمی سرمایے کے انخلا اور عدم دلچسپی کی وجہ سے متعدد بین الاقوامی کمپنیوں نے بھارتی شیئرز میں اپنی سرمایہ کاری کم کر کے صفر کر دی ہے۔ غیر ملکی سرمایہ کاروں کی جانب سے بھارتی مارکیٹ سے سرمایے کے اس تیز رفتار انخلا کے بعد بھارتی سٹاک ایکسچینج میں غیر ملکی سرمایہ کاری گزشتہ 17 سال کی کم ترین سطح پر آ گئی ہے۔

رپورٹ کے مطابق عالمی کمپنیوں اور سرمایہ کاروں کی جانب سے بھارتی مارکیٹ سے فاصلہ اختیار کرنے کی بنیادی وجوہات میں جدید ٹیکنالوجی بالخصوص مصنوعی ذہانت (AI) کے شعبے میں مواقع کی کمی اور کم منافع بخش ہونا شامل ہیں۔ بینک آف امریکہ کی جانب سے کیے گئے ایک حالیہ سروے نے بھی ان انکشافات کی تصدیق کرتے ہوئے بھارت کو ایشیا کی سب سے کم پسندیدہ اور غیر کشش مارکیٹ قرار دیا ہے۔

تجزیہ کاروں کا کہنا ہے کہ غیر ملکی سرمایے کے مسلسل انخلا اور بھارتی سٹاک مارکیٹ کی اس بدحالی نے نریندر مودی اور ان کی حکومت کی جانب سے معاشی ترقی اور خوشحالی کے کیے جانے والے بلند بانگ دعووں کا پول کھول دیا ہے۔ معاشی عدم استحکام اور عالمی سرمایہ کاروں کی عدم توجہی کے باعث بھارتی معیشت کو شدید دباؤ کا سامنا کرنا پڑ رہا ہے۔