شاہ رخ خان صرف بڑے سٹار ہیں، اداکار نہیں: فردوس جمال

لاہور: اپنے بے باک تبصروں اور منفرد اداکاری کے لیے معروف پاکستان کے سینئر اداکار فردوس جمال نے ایک بار پھر بالی ووڈ کی بڑی شخصیت کو اپنے نشانے پر لے لیا ہے۔ اس بار انہوں نے بھارتی سنیما کے بے تاج بادشاہ شاہ رخ خان کی اداکاری پر کڑی تنقید کرتے ہوئے انہیں ایک بڑا ‘اسٹار’ تو تسلیم کر لیا، تاہم ایک بڑا ‘اداکار’ ماننے سے صاف انکار کر دیا۔

حال ہی میں اداکار فردوس جمال ایک نجی ٹی وی چینل کے مزاحیہ شو میں بطور مہمان شریک ہوئے، جہاں انہوں نے روایتی کھرے انداز میں مختلف فنکاروں اور ان کی فنی صلاحیتوں پر کھل کر بات چیت کی

دورانِ گفتگو فردوس جمال نے بالی ووڈ کے شہرہ آفاق لیجنڈری اداکار دلیپ کمار (مرحوم) کو زبردست خراجِ تحسین پیش کیا، لیکن ساتھ ہی شاہ رخ خان کا ان سے موازنہ کرنے والوں کو آڑے ہاتھوں لیا۔ “میں دلیپ کمار کا بہت بڑا مداح ہوں، لیکن شاہ رخ خان کا دلیپ کمار سے موازنہ کرنا سراسر غلط ہے۔ دلیپ کمار ایک منفرد، گہرے اور عظیم اداکار تھے، جبکہ شاہ رخ خان اپنی پوری فلمی تاریخ میں اس معیار کی پختہ اداکاری پیش کرنے میں ناکام رہے ہیں۔”

فردوس جمال نے شاہ رخ خان کے اندازِ بیان پر تکنیکی گفتگو کرتے ہوئے کہا کہ کنگ خان کی ڈائیلاگ ڈیلیوری (ادائیگی)، تلفظ اور اندازِ گفتگو میں وہ پختگی اور گہرائی نظر نہیں آتی جو ایک عظیم اور کلاسک اداکار کی بنیادی پہچان ہوتی ہے۔

انہوں نے اپنی بات کو سمیٹتے ہوئے واضح کیا کہ شاہ رخ خان بلا شبہ ایک غیر معمولی شہرت اور فین فالونگ رکھنے والے عالمی سپر اسٹار ضرور ہیں، لیکن اگر خالصتاً فنِ اداکاری کے ترازو میں تولا جائے، تو ان کا مقام اتنا بلند نہیں ہے جتنی ان کی مقبولیت دکھائی دیتی ہے۔ فردوس جمال کا یہ بیان سامنے آتے ہی سوشل میڈیا پر شاہ رخ خان کے مداحوں اور پاکستانی صارفین کے درمیان ایک نئی بحث چھڑ گئی ہے۔