وفاق کی 10 لاکھ ٹن گندم درآمد کی تیاری، ٹیکس اور ڈیوٹیز میں مکمل چھوٹ کی تجویز

وفاقی حکومت نے ملک میں گندم کی بلا تعطل دستیابی اور اسٹریٹجک ذخائر کی بحالی کے لیے 10 لاکھ میٹرک ٹن تک گندم درآمد کرنے کی تیاریاں شروع کر دی ہیں۔ ذرائع کے مطابق وزارت نیشنل فوڈ سیکیورٹی نے گندم کی درآمد پر عائد تمام وفاقی ٹیکسز، ڈیوٹیز اور صوبائی انفراسٹرکچر ڈویلپمنٹ سیس سے استثنیٰ دینے کی سفارش کی ہے۔ درآمد پر اندازاً 34 کروڑ ڈالر کی رقم خرچ ہونے کا امکان ہے، جبکہ پاکستان زرعی ذخائر و خدمات کارپوریشن (PASCO) کے ذخائر میں موجود 10 لاکھ ٹن گندم بھی صوبوں کو فراہم کرنے کی تجویز پیش کی گئی ہے جس کی لاگت کا تخمینہ 141 ارب روپے لگایا گیا ہے۔ صوبوں کی جانب سے ذخائر میں کمی کے خدشات پر اقتصادی رابطہ کمیٹی (ECC) نے نائب وزیراعظم کی سربراہی میں ایک اسٹیئرنگ کمیٹی تشکیل دی ہے جو گندم کی درآمدی عمل اور سپلائی چین کی نگرانی کر رہی ہے۔