ایچ ون بی (H-1B) ویزا پر 100,000 ڈالر فیس کا معاملہ: امریکی اپیلز کورٹ نے ٹرمپ انتظامیہ کی درخواست مسترد کر دی

امریکی ریاست بوسٹن کی پہلی یو ایس سرکٹ کورٹ آف اپیلز نے صدر ڈونلڈ ٹرمپ کی انتظامیہ کی اس درخواست کو مسترد کر دیا ہے جس میں ایچ ون بی (H-1B) کام کے ویزوں پر عائد 100,000 ڈالر فیس کو دوبارہ بحال کرنے کی اپیل کی گئی تھی۔ تین رکنی ججز کے پینل نے فیصلے میں کہا کہ حکومت یہ ثابت کرنے میں ناکام رہی ہے کہ صدر کے پاس اس طرح کی بھاری رقم عائد کرنے کا قانونی اختیار موجود ہے۔ عدالت کے اس فیصلے کے بعد نچلی عدالت کا وہ حکم نامہ برقرار رہے گا جس نے اس متنازعہ فیس پر فی الحال روک لگا دی تھی۔

یہ فیصلہ جون میں ڈسٹرکٹ جج لیو سوروکن کی جانب سے دیے گئے فیصلے کی توثیق کرتا ہے، جس میں انہوں نے کہا تھا کہ 100,000 ڈالر کی رقم دراصل ایک “ٹیکس” کی مانند ہے اور امریکی آئین کے تحت ٹیکس عائد کرنے کا اختیار صرف کانگریس کے پاس ہے نہ کہ امریکی صدر کے پاس۔ ستمبر 2025 میں ٹرمپ انتظامیہ نے اس فیس کا اعلان کرتے ہوئے دعویٰ کیا تھا کہ ایچ ون بی ویزا پروگرام کا غلط استعمال کرکے مقامی امریکی ورکرز کی جگہ سستے غیر ملکی ماہرین کو رکھا جا رہا ہے، جس کے بعد 20 ڈیموکریٹک اٹارنی جنرلز نے اس فیصلے کو عدالت میں چیلنج کیا تھا۔

عام طور پر ایچ ون بی ویزا کے لیے کمپنیاں 2,000 سے 5,000 ڈالر کے درمیان فیس ادا کرتی تھیں، لیکن اس 100,000 ڈالر کی غیر معمولی فیس کی وجہ سے درخواستوں میں نمایاں کمی دیکھی گئی۔ قانون دانوں اور امیگریشن ماہرین کے مطابق، اپیلز کورٹ کے اس تاز ترین فیصلے کے بعد ان غیر ملکی تکنیکی ماہرین اور ورکرز کو بڑی راحت ملے گی جن کی نوکریوں کے حقوق یا ویزا کے عمل اس بھاری فیس کی وجہ سے خطرے میں پڑ گئے تھے۔