مفاہمت اور مکالمے سے سیاسی و معاشی استحکام آئے گا: چودھری سرور

سابق گورنر پنجاب چودھری سرور نے ملک کی موجودہ صورتحال پر تشویش کا اظہار کرتے ہوئے کہا ہے کہ پاکستان کو درپیش سیاسی، معاشی اور سماجی بحرانوں سے نکالنے کے لیے سیاسی مفاہمت، باہمی مکالمے اور اعتماد کی بحالی کی اشد ضرورت ہے۔ انہوں نے زور دیا کہ سیاسی اختلافات کو ذاتی دشمنی میں تبدیل کرنے کے بجائے تمام سیاسی فریقین کو قومی مفاد کی خاطر فوری طور پر مذاکرات کی میز پر بیٹھنا چاہیے، کیونکہ سیاسی استحکام کے بغیر معیشت کی بحالی اور عوامی مسائل کا حل ناگزیر ہے۔

بانی پی ٹی آئی کی بہن علیمہ خان کی گرفتاری پر ردِعمل دیتے ہوئے سابق گورنر نے کہا کہ اس نوعیت کے اقدامات سے سیاسی کشیدگی میں مزید اضافہ ہوگا اور مفاہمت کی فضا مکدر ہوگی، جس کا ملک اس وقت بالکل متحمل نہیں ہو سکتا۔ انہوں نے حکومت اور اپوزیشن دونوں پر زور دیا کہ وہ تلخ ماضی کو بھول کر تحمل، برداشت اور اعلیٰ درجے کی ذمہ داری کا مظاہرہ کریں۔ چودھری سرور نے واضح کیا کہ قومی مسائل کا پائیدار حل طاقت کے استعمال یا گرفتاریوں میں نہیں بلکہ آئین و قانون کی حد میں رہتے ہوئے بامقصد مذاکرات اور سیاسی مفاہمت میں پنہاں ہے۔