پاک روس مشترکہ فوجی مشق دروزبہ 9 اور پاک عمان مشق وشاق الجبل 2 کا آغاز

پاک فوج کے شعبہ تعلقاتِ عامہ (آئی ایس پی آر) کے مطابق پاکستان اور روس کے درمیان نویں مشترکہ فوجی مشق ‘دروزبہ 9’ (Druzhba-IX) اور پاکستان و عمان کے درمیان دوسری مشترکہ فوجی مشق ‘وشاق الجبل 2’ (Al-Washaq-II) کا باقاعدہ آغاز ہو گیا ہے۔ آئی ایس پی آر کے ترجمان نے بتایا کہ پاک روس مشترکہ مشق کا افتتاح چراٹ کے مقام پر ہوا جبکہ پاک عمان مشترکہ مشق کی افتتاحی تقریب نیشنل کاؤنٹر ٹیررازم سینٹر (NCTC) پبی میں منعقد کی گئی۔

ان دونوں دو ہفتائی مشترکہ عسکری مشقوں میں پاکستان آرمی کے ساتھ ساتھ روسی مسلح افواج اور شاہی عمانی فوج کے خصوصی دستے عملی طور پر حصہ لے رہے ہیں۔ آئی ایس پی آر کے مطابق، مشقوں کا بنیادی مقصد انسدادِ دہشت گردی کے خلاف حکمتِ عملی، جدید حربی مہارتوں اور بہترین آپریشنل طریقہ کار کا تبادلہ کرنا ہے۔ ان مشترکہ تربیتی مشقوں سے نہ صرف تمام شریک افواج کی پیشہ ورانہ و جنگی صلاحیتوں میں نکھار آئے گا بلکہ دوست ممالک کے ساتھ پاکستان کے باہمی دفاعی تعاون، ہم آہنگی اور سیکیورٹی روابط مزید مضبوط ہوں گے۔