وزارت خزانہ نے آئی ایم ایف پروگرام سے متعلق گمراہ کن رپورٹنگ کی وضاحت جاری کر دی

وزارتِ خزانہ نے پاکستان کے آئی ایم ایف (IMF) پروگرام کے حوالے سے سامنے آنے والی میڈیا رپورٹس اور تبصروں پر وضاحت جاری کرتے ہوئے کہا ہے کہ آئی ایم ایف پروگرام صرف وزارتِ خزانہ کا نہیں بلکہ حکومت کا مجموعی پروگرام ہے۔ اس میں وزارتِ منصوبہ بندی، توانائی، ایف بی آر، اسٹیٹ بینک اور تمام صوبائی حکومتیں شامل ہیں، جو اپنے اپنے دائرہ کار سے متعلق تکنیکی مذاکرات اور اہداف کے تعین کا حصہ ہیں۔ وزارت کے مطابق یہ پروگرام صرف مالیاتی اعداد و شمار تک محدود نہیں بلکہ معاشی ترقی، سماجی تحفظ، گورننس اور توانائی کی اصلاحات سمیت وسیع تر مقاصد پر مبنی ہے۔

وزارتِ خزانہ نے واضح کیا کہ پیٹرولیم ڈیولپمنٹ لیوی (PDL) پروگرام کا بنیادی یا مرکزی نکتہ نہیں بلکہ یہ مختلف مالیاتی ذرائع میں سے ایک ہے۔ مالیاتی حکمتِ عملی میں ایف بی آر کے ٹیکس نیٹ کو بڑھانا، صوبائی اخراجات کو متوازن بنانا اور بالخصوص زرعی آمدن پر ٹیکس کا نفاذ شامل ہے، جو آئینی طور پر صوبوں کی ذمہ داری ہے۔ بیان میں بتایا گیا کہ گزشتہ مالی سال کے دوران ملک پر قرضوں میں اضافے کی رفتار دو دہائیوں کی کم ترین سطح پر رہی۔ مزید برآں، کمزور طبقات کے تحفظ کے لیے بینظیر انکم سپورٹ پروگرام (BISP) کے فنڈز کو مہنگائی کے تناسب سے بڑھایا گیا ہے۔ وزارت نے زور دیا کہ اقتصادی استحکام اور مالیاتی پائیداری ہی طویل المدتی پائیدار معاشی ترقی اور نجی سرمایہ کاری کی ضامن ہے۔