پنجاب میں امن و امان کی صورتحال حوصلہ افزا، مختلف آپریشنز جاری ہیں: مریم نواز

وزیراعلیٰ پنجاب مریم نواز شریف کی زیرِ صدارت صوبائی ایپکس کمیٹی کا اہم اجلاس منعقد ہوا، جس میں صوبے میں امن و امان کی مجموعی صورتحال، دہشت گردی کے خلاف جاری اقدامات اور سیکیورٹی امور پر تفصیلی جائزہ لیا گیا۔ اجلاس میں کمانڈر لاہور کور نے بھی شرکت کی۔ بریفنگ کے دوران پیفٹاک (PEFTAC) میں آرٹیفیشل انٹیلیجنس ہب کے قیام کو اداروں کے درمیان بروقت معلومات کے تبادلے کے لیے ایک بڑا قدم قرار دیا گیا۔ اس موقع پر وزیراعلیٰ نے پاک فوج کی پیشہ ورانہ صلاحیتوں، بالخصوص ‘فتنہ الہندوستان’ کے خلاف کامیابیوں اور ‘آپریشن ضربِ للہ الحق’ کے شہداء—کیپٹن ابوذر فاروق اور لیفٹیننٹ شیراز بابر—کو خراجِ عقیدت پیش کیا۔

اجلاس میں بتایا گیا کہ کچے کے علاقے میں پائیدار امن، صحت، تعلیم اور معاشی ترقی کے لیے 30 ارب روپے سے زائد کا جامع ترقیاتی پیکیج جاری کیا گیا ہے، جس کے تحت 93 منصوبے شروع کیے جا رہے ہیں۔ ان منصوبوں میں 62 کروڑ روپے کی لاگت سے اسٹیل برج کی تعمیر، اسمارٹ پولیس اسٹیشنز، چیک پوسٹس کا قیام اور مقامی آبادی کے لیے اسکل ڈیولپمنٹ پروگرام شامل ہیں۔ وزیراعلیٰ نے واضح کیا کہ پنجاب میں غیر قانونی طور پر مقیم غیر ملکیوں کے اخراج کو یقینی بنایا جا رہا ہے، جبکہ محکمہ پولیس میں زیرو ٹالرنس پالیسی کے تحت کرپشن پر 718 ملازمین کو ملازمت سے برطرف کیا جا چکا ہے۔ انہوں نے کہا کہ باڈی ورن کیمروں اور سیف سٹی کے دائرہ کار کی توسیعی تکنیک کے باعث صوبے میں اسٹریٹ کرائمز اور قبضہ مافیا کے خلاف نمایاں کامیابی ملی ہے۔