احتجاج، دھرنے جاری، حافظ نعیم الرحمان کا لیوی ختم کرانے تک پیچھے نہ ہٹنے کا اعلان

امیر جماعتِ اسلامی حافظ نعیم الرحمٰن نے کہا ہے کہ جماعتِ اسلامی کا احتجاج اور دھرنے تاحال جاری ہیں اور مطالبات کی منظوری تک جدوجہد جاری رہے گی۔ دنیا نیوز کے پروگرام ’’دنیا مہربخاری کے ساتھ‘‘ میں گفتگو کرتے ہوئے انہوں نے بتایا کہ وزیراعظم شہباز شریف کی درخواست پر لانگ مارچ عارضی طور پر روکا گیا ہے، اور وزیراعظم کی وطن واپسی پر ان کے ساتھ تفصیلی ملاقات ہوگی۔

حافظ نعیم الرحمٰن نے واضح کیا کہ جماعتِ اسلامی سڑکوں پر موجود ہے اور گھر واپس نہیں گئی، انہوں نے عوام سے وعدہ کیا کہ پیٹرولیم لیوی کا خاتمہ کرائے بغیر جماعتِ اسلامی پیچھے نہیں ہٹے گی۔ سیاسی صورتحال پر بات کرتے ہوئے ان کا کہنا تھا کہ پاکستان تحریکِ انصاف (پی ٹی آئی) کا اپنا ایجنڈا ہے اور جماعتِ اسلامی کا اپنا، تاہم حکومت کو درپیش سیاسی کشیدگی ختم کرنے کے لیے پی ٹی آئی کے ساتھ باضابطہ بات چیت کا آغاز کرنا چاہیے۔ انہوں نے مزید کہا کہ وزیراعظم نے عوام کو درپیش معاشی مشکلات میں ریلیف دینے کی یقین دہانی کرائی ہے۔