فیصل قریشی کا تمغہ امتیاز نہ ملنے پر طنزیہ ردعمل

پاکستان کے مایہ ناز اداکار فیصل قریشی نے شوبز انڈسٹری میں 33 سال مکمل کرنے کے باوجود تمغہ امتیاز نہ ملنے پر اپنی ناراضگی کا اظہار منفرد اور طنزیہ انداز میں کیا ہے۔ حال ہی میں ایک نجی انٹرویو کے دوران جب ان سے ستارہ امتیاز ملنے سے متعلق سوال کیا گیا، تو انہوں نے مزاحیہ رنگ اختیار کرتے ہوئے کہا کہ “میں سوچ رہا ہوں ‘امتیاز سپر سٹور’ جا کر کھڑا ہو جاؤں اور کہوں کہ مجھے ستارہ نہیں مل رہا”۔ اداکار نے انکشاف کیا کہ ان کا نام دو بار ایوارڈ کے لیے بھیجا گیا مگر واپس آگیا؛ جب ان سے اس کی وجہ پوچھی گئی تو انہوں نے طنزاً کہا کہ شاید مجھ میں “کیلشیئم کی کمی” رہ گئی تھی اس لیے نام نکال دیا گیا۔ فیصل قریشی نے واضح کیا کہ وہ ایک محبِ وطن انسان ہیں اور اگر کبھی انہیں اس اعزاز کے قابل سمجھا گیا تو وہ اسے ضرور قبول کریں گے، تاہم فی الحال وہ ایوارڈز کے لیے کی جانے والی ای میلز اور نامزدگیوں کے عمل کو محض ایک رسمی کارروائی ہی سمجھتے ہیں۔