لیفٹیننٹ جنرل (ر) فیض حمید نے سزا کے خلاف اپیل دائر کر دی

پاکستان کی خفیہ ایجنسی آئی ایس آئی کے سابق سربراہ لیفٹیننٹ جنرل (ریٹائرڈ) فیض حمید نے اختیارات سے تجاوز اور ٹاپ سٹی کیس میں فوجی عدالت کی جانب سے سنائی گئی سزا کے خلاف اپیل دائر کر دی ہے۔
فیض حمید کے وکیل میاں علی اشفاق کا کہنا ہے کہ اپیل ایجوٹینٹ جنرل کے دفتر میں جمع کروا دی گئی ہے اور اس اپیل پر فیصلہ فیلڈ مارشل عاصم منیر کریں گے۔ ان کا کہنا تھا کہ فیصلے کے 40 دن کے اندر اپیل دائر کرنے کا قانونی حق حاصل ہوتا ہے۔
وکیل کے مطابق اگر اپیل مسترد ہو جاتی ہے تو مزید دو قانونی فورمز دستیاب ہوں گے، جن میں ہائی کورٹ اور سپریم کورٹ آف پاکستان شامل ہیں۔
واضح رہے کہ فوجی عدالت نے لیفٹیننٹ جنرل (ر) فیض حمید کو 14 سال قید بامشقت کی سزا سنائی تھی، جسے ماہرین پاکستان کی سیاسی اور عسکری تاریخ کے بڑے اور غیر معمولی واقعات میں شمار کر رہے ہیں۔
آئی ایس پی آر کے مطابق یہ سزا 12 اگست 2024 کو پاکستان آرمی ایکٹ کے تحت شروع ہونے والی فیلڈ جنرل کورٹ مارشل کی 15 ماہ طویل کارروائی کے بعد سنائی گئی۔ فوجی بیان میں الزامات کی تفصیلات ظاہر نہیں کی گئیں، تاہم ماہرین اسے 2018 کے عام انتخابات، مختلف سیاسی احتجاجی مظاہروں اور 9 مئی 2023 کے واقعات سے جوڑ رہے ہیں۔