فہد شیخ کی سید محمد احمد سے بدسلوکی کی تردید، معافی مانگ لی

پاکستانی شوبز انڈسٹری کے اداکار فہد شیخ نے سینئر اداکار سید محمد احمد کے ساتھ مبینہ بدسلوکی اور ہراسانی کے الزامات کو سختی سے مسترد کرتے ہوئے واضح کیا ہے کہ سوشل میڈیا پر وائرل ہونے والی ویڈیو کو سیاق و سباق سے ہٹ کر پیش کیا جا رہا ہے۔ انسٹاگرام پر متعدد اسٹوریز کے ذریعے اپنا موقف دیتے ہوئے فہد شیخ نے کہا کہ شوٹنگ سیٹ پر فنکار ایک خاندان کی طرح ہوتے ہیں اور کسی کی دل آزاری ان کا مقصد نہیں تھا؛ یہ واقعہ ایک باہمی مذاق کا حصہ تھا جس کا آغاز خود احمد صاحب نے کیا تھا۔ فہد شیخ نے انکشاف کیا کہ وہ تنازع بڑھنے سے قبل ہی ذاتی طور پر سینئر اداکار سے معذرت کر چکے تھے اور اگر ضرورت پڑی تو عوامی سطح پر بھی معافی مانگنے کے لیے تیار ہیں، جبکہ ویڈیو کو غلط رنگ دینے والوں کے خلاف قانونی کارروائی کی جا رہی ہے۔ دوسری جانب، سید محمد احمد نے بھی انسٹاگرام پر اپنے ایک بیان میں اس مشکل وقت میں حوصلہ افزائی اور حمایت کرنے والے تمام ساتھی فنکاروں کا شکریہ ادا کیا۔