امریکی یونیورسٹی نے ایرانی عہدیدار علی لاریجانی کی ڈاکٹر بیٹی کو برطرف کردیا

امریکا کی ایموری یونیورسٹی نے ایرانی سپریم نیشنل سکیورٹی کونسل کے سیکرٹری علی لاریجانی کی بیٹی فاطمہ اردشیر لاریجانی کو ملازمت سے برطرف کر دیا۔
فاطمہ اردشیر لاریجانی ایموری یونیورسٹی کے میڈیکل سکول میں اسسٹنٹ پروفیسر کے طور پر ہیماٹولوجی اور میڈیکل آنکولوجی پڑھا رہی تھیں۔ ان کا نام فیکلٹی کی ویب سائٹ سے بھی ہٹا دیا گیا ہے۔
وِن شپ کینسر انسٹی ٹیوٹ نے تصدیق کی کہ ایرانی حکومت کے اعلیٰ اہلکار کی بیٹی اب یونیورسٹی کی ملازم نہیں ہیں۔
واضح رہے کہ 19 جنوری کو ایموری یونیورسٹی کے باہر درجنوں ایرانی نژاد امریکیوں نے احتجاج کیا تھا، جس میں ایران میں مظاہروں کے خلاف کریک ڈاؤن کے تناظر میں ڈاکٹر فاطمہ لاریجانی کی برطرفی کا مطالبہ کیا گیا تھا۔
چند روز قبل امریکی ایوان نمائندگان کے رکن ارل کارٹر نے یونیورسٹی حکام کو خط لکھ کر فاطمہ لاریجانی کو برطرف کرنے اور ان کا میڈیکل لائسنس منسوخ کرنے کی درخواست کی تھی۔