برطانیہ میں فلسطین کا سفارت خانہ باضابطہ طور پر فعال ہوگیا

برطانوی میڈیا کے مطابق فلسطین نے مغربی لندن کے علاقے ہیمرسمتھ میں اپنا سفارت خانہ قائم کر لیا ہے، جو اس سے قبل فلسطینی مشن کے طور پر کام کر رہا تھا۔

سفارت خانے کی افتتاحی تقریب میں متعدد غیر ملکی سفارت کاروں، برطانوی حکومت کے نمائندے الیسٹئر ہیریسن اور فلسطین کے حامی افراد نے شرکت کی۔ اس موقع پر خطاب کرتے ہوئے فلسطینی سفیر حسام زملوط نے سفارت خانے کی عمارت کو برطانوی سرزمین پر فلسطین کا ایک حصہ قرار دیا۔

فلسطینی سفیر نے کہا کہ یہ سفارت خانہ امن، ثابت قدمی، وقار اور فلسطینی عوام کی آزادی اور انصاف کے لیے طویل جدوجہد کی علامت ہے۔ انہوں نے اس پیش رفت کو برطانیہ اور فلسطین کے تعلقات میں ایک تاریخی لمحہ اور اہم موڑ قرار دیتے ہوئے کہا کہ یہ اقدام فلسطینی عوام کے حقِ خود ارادیت اور آزادی کے سفر میں ایک بڑی کامیابی ہے۔

حسام زملوط کا کہنا تھا کہ سفارت خانے کا قیام فلسطینی شناخت کے تسلسل کا ثبوت ہے اور یہ غزہ، مغربی کنارے اور پناہ گزین کیمپوں میں رہنے والے فلسطینیوں کے لیے مزاحمت اور امید کا پیغام ہے۔

واضح رہے کہ یہ دفتر کئی دہائیوں سے برطانیہ میں فلسطین کے نمائندہ دفتر کے طور پر سفارتی سرگرمیاں انجام دے رہا تھا، تاہم اسے مکمل سفارتی حیثیت حاصل نہیں تھی۔ طویل عرصے تک یہ دفتر فلسطینی مشن کہلاتا رہا اور محدود اختیارات کے ساتھ کام کرتا رہا، مگر اب یہ باضابطہ طور پر سفارت خانے کی حیثیت سے فعال ہو گیا ہے۔