ایلون مسک اوپن اے آئی کے خلاف مقدمہ ہار گئے، امریکی جیوری کا فیصلہ

دنیا کے امیر ترین شخص ایلون مسک اوپن اے آئی کے خلاف دائر کیا گیا مقدمہ ہار گئے ہیں۔

خبر رساں ادارے رائٹرز کے مطابق امریکی جیوری نے پیر کے روز فیصلہ سناتے ہوئے قرار دیا کہ ایلون مسک کا مقدمہ قانونی طور پر درست نہیں تھا اور اوپن اے آئی کو اس بات کا ذمہ دار نہیں ٹھہرایا جا سکتا کہ اس نے انسانیت کی بہتری کے اپنے ابتدائی مشن سے انحراف کیا۔

جیوری نے متفقہ طور پر کہا کہ مقدمہ دائر کرنے میں تاخیر کی گئی تھی جس کے باعث یہ قابل سماعت نہیں رہا۔

مقدمے کی سماعت اٹھائیس اپریل کو شروع ہوئی تھی اور گیارہ روز تک جاری رہی۔ یہ کیس مصنوعی ذہانت کے مستقبل کے حوالے سے انتہائی اہم سمجھا جا رہا تھا کیونکہ اس میں یہ سوال زیر بحث تھا کہ اس ٹیکنالوجی کے استعمال اور اس کے فوائد پر کس کا حق ہے۔

سماعت کے دوران ایلون مسک اور اوپن اے آئی کے سربراہ سیم آلٹمین کی ساکھ پر بھی سوالات اٹھائے گئے۔

ایلون مسک نے مؤقف اختیار کیا تھا کہ اوپن اے آئی نے سرمایہ کاروں کے مفاد کو ترجیح دیتے ہوئے اپنے غیر منافع بخش مشن کو نظرانداز کیا ہے اور مصنوعی ذہانت کی حفاظت کو بھی اہمیت نہیں دی گئی۔

اوپن اے آئی کی جانب سے کہا گیا کہ اصل میں ایلون مسک خود مالی مفادات کے تحت کام کر رہے تھے اور انہوں نے مقدمہ دیر سے دائر کیا۔

اوپن اے آئی کے وکیل ولیم ساویٹ نے کہا کہ ایلون مسک بعض شعبوں میں کامیاب ہیں لیکن مصنوعی ذہانت کے میدان میں ان کا دعویٰ کمزور ہے۔