’ڈیوکس آف ہیزرڈ‘ کے معروف اداکار بین جونز 84 برس کی عمر میں انتقال کر گئے

مقبول ترین امریکی ٹی وی سیریز ’ڈیوکس آف ہیزرڈ‘ (The Dukes of Hazzard) میں کوٹر ڈیونپورٹ کا لازوال کردار ادا کرنے والے معروف امریکی اداکار بين جونز 84 برس کی عمر میں انتقال کر گئے ہیں۔

اداکار کی اہلیہ الما ویئٹر (Alma Viator) نے سوشل میڈیا کے ذریعے ان کے ناگہانی انتقال کی تصدیق کی اور بتایا کہ بین جونز اپنے گھر پر موجود تھے جہاں انہیں شدید نوعیت کا دل کا دورہ پڑا جو جان لیوا ثابت ہوا۔ اہلیہ نے اپنے جذباتی پیغام میں ان کو یاد کرتے ہوئے لکھا کہ بین جونز نے ایک نہایت بھرپور اور محبت سے لبریز زندگی گزاری، اور آج انہوں نے اپنی زندگی کا سب سے بڑا اور سچا پیار کھو دیا ہے۔

بین جونز کی وفات کی خبر منظرِ عام پر آتے ہی شوبز انڈسٹری میں غم کی لہر دوڑ گئی اور ان کے مداحوں سمیت ’ڈیوکس آف ہیزرڈ‘ کے ساتھی فنکاروں نے گہرے دکھ کا اظہار کیا۔ شو میں ان کے ساتھ کام کرنے والے اداکار ٹام وپٹ نے بھی سوشل میڈیا پر مرحوم کو شاندار خراجِ عقیدت پیش کیا۔ اپنے تعزیتی پیغام میں ٹام وپٹ کا کہنا تھا کہ آج اس کلاسک شو نے اپنی مرکزی کاسٹ کا ایک انتہائی اہم رکن اور انہوں نے اپنا ایک مخلص دوست کھو دیا ہے۔

واضح رہے کہ بین جونز نے ’ڈیوکس آف ہیزرڈ‘ میں ایک ماہر میکینک ‘کوٹر ڈیونپورٹ’ کے روپ میں اپنی شاندار اداکاری کے ذریعے دنیا بھر کے ناظرین کے دلوں میں خاص جگہ بنائی اور ان کے اس کردار کو امریکی ٹیلی ویژن کی تاریخ میں ہمیشہ یاد رکھا جائے گا۔