ایران امریکی منظوری کے بغیر جوہری پروگرام سے متعلق کوئی اقدام نہیں کررہا: صدر ٹرمپ

امریکی صدر ڈونلڈ ٹرمپ نے وائٹ ہاؤس کے اوول آفس میں صحافیوں سے گفتگو کرتے ہوئے ایک بار پھر اپنے سخت موقف کا اعادہ کیا ہے کہ ایران کو کسی صورت بھی ایٹمی ہتھیار حاصل کرنے کی اجازت نہیں دی جائے گی، اور ایران امریکی منظوری کے بغیر اپنے جوہری پروگرام سے متعلق کوئی اقدام نہیں کر رہا۔

اوول آفس میں ایران کے جوہری پروگرام سے متعلق ثالثوں کی پیش کردہ تجاویز کے سوال پر بات کرتے ہوئے ڈونلڈ ٹرمپ نے کہا کہ اب ایران کے خلاف کارروائی کو آگے بڑھانے یا معاملے کو حتمی طور پر ختم کرنے سے متعلق فیصلہ کرنا ہوگا، اور اس حوالے سے امریکہ کی آئندہ حکمت عملی جلد طے کر لی جائے گی۔ اس موقع پر انہوں نے امریکی دفاعی عہدیداروں بالخصوص پیٹ ہیگسیتھ کی کارکردگی کو سراہتے ہوئے کہا کہ انہوں نے انتہائی شاندار کام کیا ہے۔

داخلی پالیسی اور معیشت پر بات کرتے ہوئے امریکی صدر کا کہنا تھا کہ عوام کے تحفظات اور ناراضی کے بعد انتظامیہ میں تبدیلیاں ضرور لائی جائیں گی اور وہ آئندہ دو ہفتوں کے دوران کئی اہم منصوبے اور پالیسیاں سامنے لائیں گے۔ انہوں نے دعویٰ کیا کہ عالمی سطح پر عائد کردہ ٹیرف سے بچنے کے لیے کئی بڑی غیر ملکی کمپنیاں امریکہ میں اپنے مینوفیکچرنگ پلانٹس قائم کر رہی ہیں کیونکہ اب امریکی مارکیٹ میں مصنوعات بیچنے کے لیے انہیں مقامی سطح پر ہی تیاری کرنا ہوگی۔