وسکونسن میں امریکہ کا پہلا ڈیمینشیا ولیج، 2027 میں افتتاح متوقع

امریکا کی ریاست وسکونسن میں ملک کا پہلا ڈیمینشیا ولیج جلد ہی قائم کیا جا رہا ہے، جس کا افتتاح ستمبر 2027 تک ممکنہ طور پر ہوگا۔ رپورٹ کے مطابق 65 سال سے زائد عمر کے تقریباً 11 فیصد وسکونسن کے شہری الزائمر کے مرض میں مبتلا ہیں، جو ڈیمینشیا کی عام ترین قسم ہے۔

40 ملین ڈالر سے تیار ہونے والے اس پروجیکٹ کا مقصد مریضوں کے لیے روایتی دیکھ بھال کے نظام کو بہتر کرتے ہوئے محفوظ اور کمیونٹی طرز کے ماحول کی فراہمی ہے۔

یہ منصوبہ ہاسپِس کیئر تنظیم ایگریس (Agrace) کی جانب سے میڈیسن کیمپس میں شروع کیا جا رہا ہے، جہاں مریض 8 افراد کے چھوٹے گروپس میں مشترکہ گھروں میں قیام کریں گے۔ طبی عملہ ہمہ وقت روزمرہ سرگرمیوں میں مدد فراہم کرے گا۔

نیا ڈیمینشیا ولیج نیدرلینڈز کے ہوگے ویک (Hogeweyk) ماڈل کی طرز پر بنایا جا رہا ہے تاکہ مریض زیادہ سے زیادہ معمول کی زندگی گزار سکیں۔ تاہم، ایگریس نے اہلِ خانہ کے ممکنہ اخراجات کے بارے میں ابھی کوئی تفصیلات نہیں بتائی ہیں۔