ہتک عزت کیس، عدالت کا احسن اقبال کے حق میں فیصلہ

ڈسٹرکٹ اینڈ سیشن کورٹ اسلام آباد نے وفاقی وزیر اور مسلم لیگ (ن) کے سینئر رہنما احسن اقبال کی جانب سے دائر کردہ ہتکِ عزت کے دعوے کا فیصلہ سناتے ہوئے پی ٹی آئی رہنما مراد سعید کو 25 لاکھ روپے ہرجانہ ادا کرنے کا حکم دے دیا ہے۔

ایڈیشنل سیشن جج ہاکم خان نے کیس کا فیصلہ سناتے ہوئے قرار دیا کہ مراد سعید کی جانب سے احسن اقبال پر 70 ارب روپے کی کرپشن، اختیارات کے ناجائز استعمال اور غیر قانونی کمیشن کے الزامات ثابت نہیں ہو سکے۔ عدالت نے اپنے فیصلے میں واضح کیا کہ یہ بلا ثبوت الزامات ہتکِ عزت کے زمرے میں آتے ہیں اور اس متنازع بیان سے احسن اقبال کی ساکھ، عزت اور وقار کو شدید نقصان پہنچا، جس سے عام شہریوں میں ان کے بارے میں منفی تاثر پیدا ہوا۔

عدالتی فیصلے کے مطابق مراد سعید کے یہ الزامات احسن اقبال کی دیانت، کردار اور شہرت پر براہِ راست حملہ تھے۔ کارروائی کے دوران مراد سعید نہ تو خود عدالت میں پیش ہوئے اور نہ ہی انہوں نے اپنے داغدار الزامات کے حق میں کوئی ثبوت فراہم کیا۔

اگرچہ احسن اقبال نے 10 ارب روپے ہرجانے کا دعویٰ دائر کر رکھا تھا، لیکن عدالت نے دستیاب شواہد کی روشنی میں اس رقم کو حد سے زیادہ قرار دیا اور 25 لاکھ روپے کا منصفانہ ہرجانہ مقرر کیا۔ واضح رہے کہ یہ معاملہ 2019 میں مراد سعید کی اس پریس کانفرنس سے متعلق ہے جس میں انہوں نے بطور وفاقی وزیر احسن اقبال پر ملتان، سکھر موٹر وے منصوبے میں سنگین کرپشن کے الزامات عائد کیے