طورخم بارڈر پر کسٹمز کی بڑی کارروائی، اسلحہ سمگلنگ کی کوشش ناکام

طورخم: کسٹمز حکام نے خفیہ اطلاع پر بروقت کارروائی کرتے ہوئے افغانستان سے آنے والے ایک خالی ٹرک سے ہزاروں کارتوس اور میگزین برآمد کر لیے۔

کسٹمز ذرائع کے مطابق کارروائی کسٹم کلیکٹر اپریزمنٹ اور ایڈیشنل کلیکٹر امیر حمزہ چیمہ کی خصوصی ہدایات پر کی گئی۔ مشتبہ ٹرک کو معمول کی چیکنگ کے دوران روکا گیا، جہاں تفصیلی تلاشی کے نتیجے میں بڑی مقدار میں اسلحہ برآمد ہوا۔

حکام نے اسلحہ فوری طور پر قبضے میں لے لیا جبکہ ایک ملزم کو گرفتار کر کے جیل منتقل کر دیا گیا ہے۔ واقعے سے متعلق مزید تفتیش جاری ہے۔

کسٹمز ذرائع کا کہنا ہے کہ یہ وہ گاڑیاں ہوتی ہیں جو پاکستان سے غیر قانونی طور پر مقیم افغان خاندانوں کا سامان افغانستان لے جاتی ہیں اور واپسی پر خالی واپس آتی ہیں، جنہیں سمگلنگ کے لیے استعمال کیا جاتا ہے۔