چین میں ”کاکروچ کافی“ نوجوانوں میں مقبول، سوشل میڈیا پر وائرل

بیجنگ: چین کے دارالحکومت بیجنگ کے ایک کیڑوں کے میوزیم میں پیش کی جانے والی کاکروچ کافی نے سوشل میڈیا پر ہلچل مچا دی ہے۔

میوزیم کے کافی شاپ میں یہ انوکھی کافی پیش کی جا رہی ہے، جس میں پسے ہوئے کاکروچ اور خشک یلو میل ورمز شامل ہیں۔ یہ کافی نوجوانوں میں تیزی سے مقبول ہو رہی ہے۔ اس کافی کی قیمت 45 یوآن (تقریباً 6 ڈالر) ہے اور یہ رواں سال جون کے آخر میں متعارف کرائی گئی تھی، مگر حال ہی میں سوشل میڈیا پر وائرل ہونے کے بعد اس کی مانگ میں اضافہ ہوا ہے۔

میوزیم انتظامیہ کے مطابق چونکہ یہ میوزیم کیڑوں سے متعلق ہے، تو اس مناسبت سے یہ ڈرنک متعارف کرانا ایک قدرتی آئیڈیا تھا۔ چینی ڈاکٹروں کے مطابق یلو میل ورمز پروٹین سے بھرپور ہوتے ہیں اور قوت مدافعت کو بہتر بنانے میں مدد دیتے ہیں، جبکہ کاکروچ پاؤڈر خون کی گردش بہتر کرنے میں معاون ہے۔