پاکستان کشمیریوں کی شناخت پر حملہ کبھی تسلیم نہیں کرے گا، مریم نواز

وزیراعلیٰ پنجاب مریم نواز شریف نے 05 اگست “یومِ استحصالِ کشمیر” کے موقع پر کشمیری عوام کے ساتھ غیر متزلزل یکجہتی کا اظہار کرتے ہوئے کہا ہے کہ 05 اگست 2019 کا دن کشمیریوں کی شناخت، حقوق اور مستقبل پر ننگا حملہ تھا، جسے پاکستان کبھی تسلیم نہیں کرے گا۔ انہوں نے آزادی کی جدوجہد میں جانوں کا نذرانہ پیش کرنے والے شہداء کو خراجِ عقیدت پیش کیا اور کہا کہ قائد محمد نواز شریف کے دوٹوک اور اصولی موقف کی روشنی میں پاکستانی قوم کشمیریوں کی سیاسی، سفارتی اور اخلاقی حمایت جاری رکھے گی۔ وزیراعلیٰ مریم نواز نے اقوامِ متحدہ اور انسانی حقوق کی عالمی تنظیموں سے مطالبہ کیا کہ مقبوضہ جموں و کشمیر میں جاری سنگین مظالم کا فوری نوٹس لیا جائے اور کشمیری عوام کو اقوامِ متحدہ کی قراردادوں کے مطابق حقِ خودارادیت دلانے کے لیے اپنا اثر و رسوخ استعمال کیا جائے۔