یورپی پارلیمانی وفد کی اعظم نذیر تارڑ سے ملاقات، جی ایس پی پلس پر تبادلہ خیال

یورپی پارلیمنٹ کی رکن میری خان کی سربراہی میں ایک اعلیٰ سطح کے یورپی پارلیمانی وفد نے اسلام آباد میں وفاقی وزیر برائے انسانی حقوق و قانونی امور سینیٹر اعظم نذیر تارڑ سے اہم ملاقات کی ہے۔ اس ملاقات میں پاکستان اور یورپی یونین (EU) کے دوطرفہ تعلقات، جی ایس پی پلس (GSP+) اسٹیٹس، انسانی حقوق کے تحفظ، سائبر قوانین اور جیو اسٹریٹجک معاملات پر تفصیلی تبادلہ خیال کیا گیا۔ یورپی وفد میں ڈینس ہوہلوخ، اسٹینی سلاو اسٹویانوف، توماش فروئلش، ڈین پیڈوک اور موزیز شامل تھے۔

وفاقی وزیر سینیٹر اعظم نذیر تارڑ نے یورپی وفد کو پاکستان کے آئینی فریم ورک، اقلیتوں کے حقوق اور دہشت گردی کے خلاف دی جانے والی قربانیوں سے آگاہ کرتے ہوئے زور دیا کہ پاکستان کے داخلی اور قانونی امور کو ملکی و علاقائی تناظر میں دیکھا جانا چاہیے۔ انہوں نے یہ بھی پیشکش کی کہ پاکستان کے سائبر اور دیگر قوانین کا یورپی و شمالی امریکی قوانین سے تقابلی جائزہ یورپی پارلیمنٹ کے ساتھ شیئر کیا جا سکتا ہے۔ دوسری جانب، یورپی پارلیمانی وفد نے پاکستان کی جغرافیائی اہمیت کو تسلیم کرتے ہوئے جیو پولیٹیکل بنیادوں پر پاکستان کے خلاف الزام تراشی کو نامناسب قرار دیا۔ وفد نے دونوں خطوں کے درمیان غلط فہمیوں کے خاتمے اور پاکستان کے مؤقف کو اجاگر کرنے کے لیے یورپی پارلیمنٹ میں ایک خصوصی کانفرنس منعقد کرنے کی بھی تجویز پیش کی۔