صدر پوتن کو جی 20 اجلاس میں شرکت کی امریکی دعوت کو قدر کی نگاہ سے دیکھتے ہیں: کریملن

کریملن نے واضح کیا ہے کہ روسی صدر ولادیمیر پوتن کو میامی میں ہونے والے جی 20 (G20) سربراہی اجلاس میں شرکت کے لیے امریکی دعوت کو روس قدر کی نگاہ سے دیکھتا ہے، تاہم ان کی اجلاس میں شرکت اور امریکی صدر ڈونلڈ ٹرمپ سے ملاقات کے حوالے سے فی الحال کوئی حتمی فیصلہ نہیں کیا گیا۔ کریملن کے ترجمان دمتری پیسکوف نے ماسکو میں بریفنگ کے دوران کہا کہ روس جی 20 کے تمام فارمز پر اپنی نمائندگی جاری رکھے گا۔ یوکرین تنازع کے حوالے سے بات کرتے ہوئے پیسکوف نے کہا کہ روس پرامن اور پائیدار تصفیے کے لیے مذاکرات پر تیار ہے لیکن عارضی جنگ بندی کو قبول نہیں کرے گا، جبکہ انہوں نے یورپی یونین کی جانب سے منجمد روسی اثاثوں کے اربوں یورو یوکرین منتقل کرنے کو صریحاً چوری اور غیر قانونی اقدام قرار دیا۔

دیگر سفارتی امور پر بات کرتے ہوئے کریملن کے ترجمان نے بتایا کہ آرمینیا کے وزیراعظم نکول پاشینیان کے جلد دورۂ روس کی توقع ہے، تاہم یریوان کو یوریشین اکنامک یونین اور یورپی یونین میں سے کسی ایک کے ساتھ اپنے مستقبل کے تعلقات کا ترجیحی انتخاب کرنا ہوگا۔ اس کے علاوہ، شمالی کوریا کے جنگی قیدیوں سے متعلق اطلاعات پر تبصرہ کرنے سے گریز کرتے ہوئے انہوں نے کہا کہ یہ معاطات روسی وزارتِ دفاع کے دائرہ اختیار میں آتے ہیں۔ انہوں نے یہ بھی تصدیق کی کہ صدر پوتن روس کی سلامتی کونسل کے اراکین کے ساتھ اہم آپریشنل اجلاس اور دیگر ان کیمرہ میٹنگز کی صدارت کریں گے۔