برطانیہ یوکرین تنازع کا باقاعدہ فریق بننے کے قریب پہنچ چکا ہے، روس

روس نے برطانیہ کو سخت ترین انتباہ جاری کرتے ہوئے خبردار کیا ہے کہ یوکرین کو مسلسل مالی، سیاسی اور عسکری معاونت فراہم کرنے کے باعث لندن اس تنازع کا باقاعدہ اور قانونی فریق بننے کے قریب پہنچ چکا ہے۔ روسی نائب وزیر خارجہ سرگئی ریابکوف نے میڈیا سے گفتگو کرتے ہوئے کہا کہ برطانوی اقدامات دوطرفہ اور کثیرالجہتی معاہدوں اور قانونی دستاویزات کی صریح خلاف ورزی ہیں، جس کے نتیجے میں بڑھتی ہوئی کشیدگی اور اشتعال انگیزی خود برطانیہ کی اپنی ملکی سلامتی کے لیے سنگین خطرناک نتائج کا باعث بن سکتی ہے۔

روسی نائب وزیر خارجہ کا کہنا تھا کہ ماسکو نے برطانوی ناظم الامور کو پیش کیے گئے ایک تفصیلی سفارتی مراسلے میں اپنے سخت تحفظات اور اصولی مؤقف سے باضابطہ طور پر آگاہ کر دیا ہے۔ انہوں نے افسوس کا اظہار کیا کہ برطانوی حکام کے ساتھ بات چیت کے دوران ماسکو کو بنیادی حقائق اور تحفظات باور کرانے میں شدید مشکلات کا سامنا ہے، کیونکہ لندن اپنے تعصبات اور غلط فہمیوں کی وجہ سے زمینی حقائق کو تسلیم کرنے سے گریزاں ہے۔