بیرونی قرضوں کی ادائیگی کے باعث زرمبادلہ کے ذخائر میں نمایاں کمی

اسٹیٹ بینک آف پاکستان (SBP) نے زرمبادلہ کے ذخائر کے ہفتہ وار اعداد و شمار جاری کرتے ہوئے بتایا ہے کہ بیرونی قرضوں کی بھاری ادائیگیوں کے باعث گزشتہ ہفتے کے دوران ملکی زرمبادلہ کے سرکاری ذخائر میں نمایاں کمی ریکارڈ کی گئی ہے۔ مرکزی بینک کے مطابق، اس عرصے کے دوران 2 ارب 65 کروڑ 70 لاکھ ڈالر کے کمرشل غیر ملکی قرضے ادا کیے گئے، جس کے نتیجے میں 20 جون تک اسٹیٹ بینک کے پاس موجود ذخائر گھٹ کر 9 ارب 6 کروڑ 45 لاکھ ڈالر کی سطح پر آ گئے۔

تاہم، اسٹیٹ بینک نے واضح کیا ہے کہ رواں ہفتے کے دوران ملک کو 3 ارب 10 کروڑ ڈالر کے کمرشل قرضے اور 50 کروڑ ڈالر کے کثیر الجہتی (Multilateral) قرضے موصول ہو چکے ہیں، جن کی شمولیت 27 جون کو جاری ہونے والے اگلے بریک اپ میں ظاہر ہوگی۔ مرکزی بینک کا کہنا ہے کہ اس وقت ملک کے مجموعی ذخائر 14 ارب 39 کروڑ 74 لاکھ ڈالر کی سطح پر ہیں، جن میں سے تجارتی (کمرشل) بینکوں کے پاس 5 ارب 33 کروڑ 29 لاکھ ڈالر کے ذخائر موجود ہیں۔