اوزیمپک استعمال کرنے کی افواہوں پر چارلیز تھیرون کا دلچسپ ردعمل

ہالی ووڈ کی آسکر یافتہ اداکارہ چارلیز تھیرون نے دبلا ہونے کے بعد خود پر ہونے والی حالیہ تنقید اور وزن کم کرنے والی دوا ‘اوزیمپک’ کے استعمال کی افواہوں کا انتہائی دلچسپ اور منفرد انداز میں جواب دے کر مداحوں کی توجہ حاصل کر لی ہے۔ 50 سالہ اداکارہ نے اپنے انسٹاگرام اکاؤنٹ پر نیویارک کے معروف جاپانی ریسٹورنٹ ‘تامایورا’ میں عشائیے کے دوران سوشی، مشروم سوپ اور آئس کریم سے لطف اندوز ہونے کی تصاویر شیئر کیں اور کیپشن میں لکھا، ’’آپ سب نے کہا تھا کہ کچھ کھاؤ… نیویارک کے بہترین کھانے کے لیے شکریہ۔‘‘ ان کے اس پیغام کو سوشل میڈیا صارفین کی جانب سے حالیہ طنز کا بالواسطہ جواب قرار دیا جا رہا ہے۔ واضح رہے کہ پیرس میں ہدایت کار کرسٹوفر نولن کی نئی فلم ’’دی اوڈیسی‘‘ کے پریمیئر کے موقع پر چارلیز تھیرون کے کمزور سراپے نے سوشل میڈیا پر بحث چھیڑ دی تھی، جہاں کچھ ناقدین نے انہیں ‘ڈھانچے’ سے تشبیہ دی تھی، تاہم اداکارہ کی اس نئی پوسٹ پر ان کے مداحوں نے بھرپور حمایت کا اظہار کرتے ہوئے ان کے باوقار انداز کو سراہا ہے۔