مولانا فضل الرحمان سے منسلک مدرسہ اختر العلوم کو غیر قانونی تعمیر پر نوٹس

کیپیٹل ڈویلپمنٹ اتھارٹی (سی ڈی اے) کے ڈائریکٹوریٹ آف بلڈنگ کنٹرول نے مولانا فضل الرحمان کی جماعت جمعیت علمائے اسلام (ف) سے منسلک مدرسہ اختر العلوم اسلام آباد کو بغیر منظوری عمارت تعمیر کرنے پر باضابطہ نوٹس جاری کر دیا ہے۔ سی ڈی اے کے نوٹس میں اسلام آباد کیپیٹل ٹیریٹری بلڈنگ کنٹرول ریگولیشنز 2020 (ترمیم شدہ 2023) کی خلاف ورزی کی نشاندہی کرتے ہوئے مدرسہ انتظامیہ کو 15 دن کے اندر منظور شدہ تعمیراتی نقشے جمع کرانے کی ہدایت کی گئی ہے۔ حکام نے خبردار کیا ہے کہ مقررہ مدت میں قانونی تقاضے پورے نہ کرنے کی صورت میں سی ڈی اے آرڈیننس کے تحت قانونی کارروائی کرتے ہوئے مدرسے کی عمارت کو سیل کر دیا جائے گا۔