جاپان میں سیاحوں کی انوکھی حرکت، ٹوکیو کی سڑکوں پر سینکڑوں لاوارث بیگز، جرمانوں کی تیاری

جاپان میں بین الاقوامی زائرین کی ریکارڈ آمد کے بعد ہوائی اڈوں اور بڑے شہروں کی بلدیات کو سیاحوں کی جانب سے پرانے اور لاوارث بیگز چھوڑ جانے کی غیر معمولی صورتحال کا سامنا ہے۔ ٹوکیو کے علاقے ‘توشیما’ سمیت ناریتا اور کانسائی ائیرپورٹس پر ہزاروں لاوارث بیگز جمع ہونے کے بعد مقامی حکام نے اپریل 2027 سے غیر قانونی طور پر بیگ پھینکنے والوں کے خلاف جرمانے اور سخت قانونی کارروائی کی تیاری شروع کر دی ہے۔ جاپانی کچرا تلفی قانون کے تحت غیر قانونی طور پر کچرا پھینکنے پر 5 سال تک قید یا 10 ملین ین (تقریباً 63 ہزار امریکی ڈالر) تک کا جرمانہ عائد کیا جا سکتا ہے۔ حکام کا کہنا ہے کہ سیاح جاپانی ین کی کمزوری کا فائدہ اٹھا کر نئی خریداری یا اضافی سامان کی فیس سے بچنے کے لیے پرانے سوئٹ کیس سڑکوں اور ہوٹلوں میں چھوڑ دیتے ہیں، جس سے سیکیورٹی خدشات اور انتظامی مشکلات میں اضافہ ہو رہا ہے۔