سعودیہ اور شام میں دفاعی تعاون کا معاہدہ، عالمی توانائی فراہمی کے تسلسل پر زور

سعودی عرب اور شام نے خطے میں جاری تناؤ کو کم کرنے، بحرانوں کو قابو میں رکھنے اور تمام تر تنازعات کے حل کے لیے بات چیت اور سفارت کاری کو ترجیح دینے کی ضرورت پر زور دیا ہے۔ دونوں ممالک نے علاقائی و بین الاقوامی سلامتی، سمندری جہاز رانی، توانائی کی فراہمی اور عالمی معاشی استحکام پر عسکری تصادم کے خوفناک نتائج سے متعلق خبردار کیا ہے۔

یہ اہم پیش رفت ریاض میں سعودی ولی عہد و وزیراعظم شہزادہ محمد بن سلمان اور شامی صدر احمد الشرع کے درمیان مذاکرات کے بعد سامنے آئی۔ شامی صدر خادم الحرمین الشریفین شاہ سلمان بن عبدالعزیز کی خصوصاً دعوت پر مملکت کے اہم دورے پر پہنچے تھے۔ دونوں رہنماؤں نے بحیرہ احمر، باب المندب اور آبنائے ہرمز کی اہم آبی گزرگاہوں میں سمندری جہاز رانی کی سلامتی کو خطرے میں ڈالنے والی تمام تر سرگرمیوں کو فوری طور پر روکنے کا مطالبہ کیا ہے تاکہ خطے کے استحکام کو برقرار رکھا جا سکے۔

اس اعلیٰ سطحی دورے کے دوران سعودی عرب اور شام کے درمیان متعدد اہم معاہدوں اور سمجھوتوں کی یادداشتوں (MoUs) پر دستخط کیے گئے۔ ان میں دونوں ممالک کی دفاعی وزارتوں کے درمیان باہمی تعاون کا معاہدہ، صنعتی شعبے میں شراکت داری، زراعت اور ماحولیاتی تحفظ سے متعلق معاہدے شامل ہیں۔ اس کے علاوہ ‘سعودی فنڈ برائے ترقی’ نے شام میں انفراسٹرکچر، صحت، ہاؤسنگ اور مالیاتی خدمات کی بحالی اور ترقی کے لیے متعدد منصوبوں کی منظوری دی، جو دونوں ممالک کے دوطرفہ تعلقات کی پائیدار بحالی کی عکاسی کرتے ہیں۔