انزائٹی جیسے عام عارضے سے بچنے کا آسان ترین طریقہ

امریکا میں ہونے والی ایک طبی تحقیق میں بتایا گیا ہے کہ معیاری نیند انزائٹی سے بچاؤ میں اہم کردار ادا کر سکتی ہے۔ ماہرین کے مطابق انزائٹی ایک ایسا ذہنی عارضہ ہے جو موجودہ دور میں تیزی سے عام ہو رہا ہے اور اس کا علاج عموماً سائیکو تھراپی یا ادویات سے کیا جاتا ہے۔ اس کیفیت میں مبتلا افراد کو ذہنی کے ساتھ ساتھ جسمانی مسائل کا بھی سامنا کرنا پڑتا ہے۔

کیلیفورنیا یونیورسٹی کی تحقیق میں بتایا گیا کہ عمر بڑھنے کے ساتھ جذباتی استحکام اور نیند کے انداز میں نمایاں تبدیلیاں آتی ہیں۔ اس تحقیق میں نیند، بڑھتی عمر کے ساتھ دماغی حجم میں کمی اور انزائٹی کے درمیان تعلق کا جائزہ لیا گیا۔

تحقیق میں 61 صحت مند افراد کو شامل کیا گیا جن کی عمر 65 سال سے زیادہ تھی اور انہیں روزمرہ زندگی میں کسی نہ کسی حد تک انزائٹی کا سامنا رہتا تھا۔ محققین نے نیند کے دوران دماغی سرگرمیوں کا ڈیٹا اسکینز کے ذریعے حاصل کیا اور اس بات کا تجزیہ کیا کہ نیند کے معیار کا انزائٹی کی سطح پر کیا اثر پڑتا ہے۔

نتائج سے معلوم ہوا کہ اچھی اور معیاری نیند انزائٹی کے خطرے کو کم کرنے میں مدد دیتی ہے۔ ماہرین کے مطابق ہر عمر میں بہتر نیند دماغی صحت کے لیے ضروری ہے اور یہ ذہنی دباؤ اور گھبراہٹ کو کم کرنے میں مددگار ثابت ہو سکتی ہے۔

یہ تحقیق جرنل کمیونیکیشنز سائیکولوجی میں شائع ہوئی ہے۔

انزائٹی دراصل جسم کا تناؤ کے لیے قدرتی ردعمل ہے جس میں خوف یا فکر کی کیفیت پیدا ہوتی ہے۔ اس کی عام علامات میں دل کی دھڑکن تیز ہونا، سانس پھولنا، تھکاوٹ اور توجہ مرکوز کرنے میں دشواری شامل ہیں، تاہم ہر فرد میں اس کی علامات مختلف ہو سکتی ہیں۔