برطانیہ شدید سردی کی لپیٹ میں، درجہ حرارت منفی 12 سینٹی گریڈ تک گرگیا

برطانیہ میں شدید سردی کی لہر کے باعث ہر گزرتی رات کے ساتھ کم سے کم درجۂ حرارت کے نئے ریکارڈ قائم ہو رہے ہیں۔ نورفوک کے علاقے مارہم میں درجۂ حرارت منفی 12.5 ڈگری سینٹی گریڈ تک گر گیا۔

غیر ملکی میڈیا کے مطابق سخت موسم کی وجہ سے بچوں کی کرسمس تعطیلات طویل ہو گئی ہیں اور سینکڑوں اسکول مسلسل دوسرے روز بھی نہیں کھل سکے۔ شدید سردی اور برفباری کے باعث سڑک، ریل اور فضائی سفر بھی شدید متاثر ہوا ہے، جس سے مسافروں کو مشکلات کا سامنا ہے۔

برطانوی میڈیا رپورٹس کے مطابق پیر کے روز گاڑیوں کے خراب ہونے پر مدد طلب کرنے والوں کی تعداد میں 40 فیصد اضافہ ریکارڈ کیا گیا۔

ادھر شمالی اسکاٹ لینڈ میں برفباری کے باعث ٹرین سروسز شام تک مکمل طور پر بحال ہونے کا امکان نہیں، جبکہ لندن اور ہالینڈ کے درمیان یورو اسٹار سروس میں بھی خلل پڑا ہے اور ٹرینیں برسلز سے آگے نہیں جا رہیں۔

میڈیا رپورٹس کے مطابق ایبرڈین اور انورنس ایئرپورٹس پر شدید برفباری کے باعث پروازیں منسوخ کر دی گئی ہیں، جبکہ لیورپول جان لینن ایئرپورٹ بھی عارضی طور پر مسافروں کے لیے بند کر دیا گیا ہے۔