افغان طالبان رجیم کی جابرانہ پالیسیوں اور یورپی دورےکیخلاف برازیل میں بڑا مظاہرہ

افغان طالبان حکومت کی مبینہ جابرانہ پالیسیوں اور ان کے حالیہ دورۂ برسلز کے خلاف دنیا بھر میں احتجاجی لہر شدت اختیار کر گئی ہے۔ افغان جریدے ‘ہشت صبح’ کے مطابق، انسانی حقوق کی معروف تنظیم ‘وائس آف وومن’ (Voice of Women) کے زیرِ اہتمام برازیل کے شہر ساؤ پاؤلو میں ایک بڑا احتجاجی مظاہرہ کیا گیا، جس میں طالبان کی ظالمانہ پالیسیوں اور ان کے یورپی دورے کی سخت الفاظ میں مذمت کی گئی۔

اس مظاہرے میں برازیل میں مقیم افغان مہاجرین سمیت مقامی اور بین الاقوامی انسانی حقوق کی تنظیموں کے نمائندوں نے بڑی تعداد میں شرکت کی۔ مظاہرین نے ہاتھوں میں پلے کارڈز اور پرتگالی زبان میں لکھے بینرز اٹھا رکھے تھے، جن پر “طالبان کو تسلیم نہ کریں” اور “افغان خواتین کا ساتھ دیں” جیسے نعرے درج تھے۔ مظاہرین نے افغان خواتین کی آزادی، تعلیم اور روزگار کا پرزور مطالبہ کرتے ہوئے طالبان کے خلاف سخت نعرے بازی کی۔

مظاہرین کا مؤقف تھا کہ افغان طالبان کو یورپی پارلیمنٹ میں مدعو کرنا افغان عوام اور انسانیت کے خلاف ایک سنگین جرم ہے۔ انہوں نے عالمی برادری اور اقوامِ متحدہ سے مطالبہ کیا کہ افغان طالبان کو ایک دہشت گرد گروپ کے طور پر تسلیم کیا جائے اور انہیں انسانیت کے خلاف جرائم کا مرتکب قرار دیا جائے۔

دوسری جانب، عالمی سیاسی و سفارتی ماہرین کا کہنا ہے کہ تکنیکی روابط کے بہانے طالبان کو عالمی قبولیت (Legitimacy) فراہم کرنا دنیا بھر میں انتہا پسند نظریات کی حوصلہ افزائی کا سبب بنے گا۔ برازیل میں ہونے والا یہ حالیہ احتجاج اس بات کا واضح ثبوت ہے کہ عالمی رائے عامہ طالبان حکومت کے ساتھ کسی بھی قسم کی نارملائزیشن کے سخت خلاف ہے۔