معروف بھارتی اداکار کو زہریلے کیڑے نے کاٹ لیا، حالت تشویشناک

کولکتہ: بالی ووڈ کے معروف اور سینئر اداکار راجیش شرما کی صحت اس وقت انتہائی تشویشناک ہو گئی جب جنوبی بھارتی فلم انڈسٹری کے سلیبرٹی پربھاس کی نئی فلم کی شوٹنگ کے دوران انہیں مبینہ طور پر ایک زہریلے کیڑے نے کاٹ لیا۔ طبیعت اچانک بگڑنے پر انہیں فوری طور پر کولکتہ کے ڈھاکوریا منی پال اسپتال منتقل کیا گیا، جہاں وہ اس وقت آئی سی یو (ICU) میں زیرِ علاج ہیں۔

بھارتی میڈیا رپورٹس کے مطابق، نامور اداکارہ سودیپا چٹرجی نے راجیش شرما کے اہلِ خانہ کی جانب سے جاری کردہ ایک پریس نوٹ سوشل میڈیا پر شیئر کیا، جس کے بعد یہ افسوسناک خبر منظرِ عام پر آئی۔

اہلِ خانہ کے بیان کے مطابق، یہ ناخوشگوار واقعہ حیدرآباد کی مشہور ‘راموجی فلم سٹی’ میں پیش آیا، جہاں سپر اسٹار پربھاس کی نئی فلم کی شوٹنگ کا شیڈول جاری تھا۔ شوٹنگ کے اختتام پر راجیش شرما فلم کے تکنیکی عملے (کرو) کے ساتھ سیٹ پر موجود گھنی جھاڑیوں کے پاس کھڑے تھے کہ اچانک ایک نامعلوم زہریلے کیڑے نے ان کی ٹانگ پر کاٹ لیا۔ اداکار نے اسے ایک معمولی کیڑا سمجھ کر نظرانداز کر دیا اور کوئی فوری طبی امداد حاصل نہیں کی۔ واقعے کے تقریباً چھ گھنٹے بعد ان کی دائیں ٹانگ میں شدید ترین درد اٹھا۔ اس شدید تکلیف کے باوجود انہوں نے کولکتہ کی پرواز لی، لیکن دورانِ سفر انہیں تیز بخار نے آ لیا اور حالت اس حد تک غیر ہو گئی کہ ایئرپورٹ سے سیدھا اسپتال بھاگنا پڑا۔

راجیش شرما کا علاج کرنے والے ماہر امراض ڈاکٹر اوینیو بھٹاچاریہ نے اداکار کی حالت کو نازک قرار دیتے ہوئے بتایا کہ کیڑے کے زہر نے پیر کی انگلیوں سے لے کر گھٹنے تک کے حصے کو شدید متاثر کیا ہے۔ ڈاکٹروں کے مطابق زہریلے انفیکشن کی وجہ سے اداکار کی پوری ٹانگ پر بڑے بڑے چھالے بن چکے ہیں اور زہر خون میں پھیلنے کی وجہ سے انہیں اب سانس لینے میں بھی شدید دشواری کا سامنا ہے۔

ڈاکٹروں کی ایک خصوصی ٹیم ان کی جان بچانے اور زہر کے اثر کو زائل کرنے کے لیے مسلسل کوشاں ہے۔ دوسری جانب بالی ووڈ اور ساؤتھ فلم انڈسٹری کے ستاروں سمیت مداحوں کی بڑی تعداد ان کی جلد صحتیابی کے لیے دعائیں کر رہی ہے۔