وفاقی حکومت کی الٹی گنتی شروع ہو چکی ہے: بلاول بھٹو اتحادیوں پر برس پڑے

پاکستان پیپلزپارٹی کے چیئرمین بلاول بھٹو زرداری نے وفاقی حکومت پر شدید تنقید کرتے ہوئے اعلان کیا ہے کہ موجودہ حکومت کی الٹی گنتی شروع ہو چکی ہے۔ ایک ویڈیو پیغام میں بلاول بھٹو زرداری نے آزاد کشمیر کے حالیہ انتخابات کے نتائج کو مکمل طور پر مسترد کرتے ہوئے الزام عائد کیا کہ یہ شفاف انتخابات نہیں تھے بلکہ دھاندلی، گولی اور تشدد پر مبنی ‘خونی انتخابات’ تھے۔ انہوں نے کہا کہ ان نامساعد حالات اور مبینہ سازشوں کے باوجود آزاد کشمیر کے عوام نے پیپلزپارٹی پر اعتماد کرتے ہوئے 9 نشستوں پر کامیابی دلائی۔ انہوں نے جیالوں سے اپیل کی کہ وہ 4 اگست کے الیکشن میں مظفرآباد سے باذل نقوی اور جاوید ایوب کو کامیاب کروا کر مسلم لیگ (ن) کی تدبیروں کو ناکام بنائیں۔ بلاول بھٹو نے 10 اگست کو ضلع باغ (پونچھ ڈویژن) میں عظیم الشان جلسہ عام کرنے کا اعلان کرتے ہوئے کارکنوں کو بھرپور تیاری کی ہدایت کی اور عزم ظاہر کیا کہ پیپلزپارٹی کبھی میدان نہیں چھوڑتی۔