آزاد کشمیر کا مستقبل الیکشن سے جڑا، عوام دو تہائی اکثریت دلوائیں تو آئینی ترمیم لائیں گے: بلاول

چیئرمین پاکستان پیپلز پارٹی بلاول بھٹو زرداری نے میرپور میں انتخابی جلسے سے خطاب کرتے ہوئے کہا ہے کہ آزاد کشمیر کا موجودہ الیکشن تاریخ کا اہم ترین انتخاب ہے کیونکہ اس سے خطے کا مستقبل وابستہ ہے۔ انہوں نے کہا کہ اگر عوام پیپلز پارٹی کو دو تہائی اکثریت دیں تو وہ آئینی ترمیم لائیں گے، آزاد کشمیر کی این ایف سی (NFC) میں نمائندگی یقینی بنائیں گے اور OIC میں بھی کشمیریوں کی مؤثر آواز بنیں گے۔ انہوں نے واضح کیا کہ کشمیر کا فیصلہ سندھ یا پنجاب نہیں بلکہ کشمیری عوام خود کریں گے۔

بلاول بھٹو نے آزاد کشمیر میں جاری بحران اور انٹرنیٹ کی بندش پر شدید تشویش کا اظہار کرتے ہوئے اسے عوام کے ساتھ ظلم قرار دیا۔ انہوں نے کہا کہ انہوں نے وفاقی حکومت اور مظاہرین کے درمیان حقائق سامنے لانے کے لیے ایک کمیشن قائم کرنے کی تجویز دی تھی تاکہ ذمہ داروں کا تعین ہو سکے، تاہم ابھی تک اس کا جواب نہیں ملا۔ اس موقع پر انہوں نے وفاقی وزیر کے متنازع بیان پر سخت تنقید کرتے ہوئے مطالبہ کیا کہ وہ معافی مانگیں یا استعفیٰ دیں، بصورت دیگر اسے مسلم لیگ (ن) کی پالیسی سمجھا جائے گا۔ انہوں نے عوام سے اپیل کی کہ وہ پیپلز پارٹی کو کامیاب بنا کر اپنے روشن مستقبل کی ضمانت دیں۔