افغانستان سے ڈرون حملے ملکی خود مختاری کی سنگین خلاف ورزی ہیں: بلاول بھٹو

پاکستان پیپلزپارٹی کے چیئرمین بلاول بھٹو زرداری نے افغانستان کی جانب سے پاکستان کی حدود میں ڈرونز کے ذریعے کی جانے والی دراندازی اور حملوں کی کوشش کی شدید الفاظ میں مذمت کی ہے۔ انہوں نے ان ڈرون حملوں کو پاکستان کی ملی خودمختاری اور علاقائی سالمیت کی سنگین خلاف ورزی قرار دیتے ہوئے، سرحد پر مستعد پاک افواج اور سیکیورٹی حکام کو تمام 8 دشمن ڈرونز کو اہداف تک پہنچنے سے پہلے ہی مہارت سے تباہ کرنے پر خراجِ تحسین پیش کیا۔

چیئرمین پی پی پی نے کہا کہ پاکستان نے فوری جوابی کارروائی کرتے ہوئے افغانستان میں ڈرون لانچنگ اور اسٹوکس کے 10 ٹھکانوں کو نشانہ بنا کر اس بزدلانہ اقدام کا منہ توڑ جواب دیا ہے۔ بلاول بھٹو زرداری نے طالبان حکام سے جواب طلبی کرتے ہوئے کہا کہ افغان حکومت محض لاتعلقی کے بیانات پر اکتفا نہ کرے بلکہ وضاحت دے کہ ان کی سرزمین سے پاکستان پر حملہ کیوں اور کیسے ہوا۔ انہوں نے زور دیا کہ خطے میں پائیدار امن کے قیام کے لیے ضروری ہے کہ افغان حکومت اپنی سرزمین سے پاکستان کے خلاف ہونے والی مسلح کارروائیوں کو فوراً روکے اور ذمہ داروں کے خلاف سخت ترین قانونی کارروائی کرے۔