اتحادی جماعت کا بھی حمایت سے انکار، نیتن یاہو کے دوبارہ وزیراعظم بننے کے امکانات معدوم ہوگئے

اسرائیل میں منعقدہ حالیہ عام انتخابات کے بعد بن یامین نیتن یاہو کے ایک بار پھر وزیراعظم بننے کے امکانات انتہائی معدوم ہو گئے ہیں، جبکہ مخالف دھڑے کی جانب سے حکومت سازی کی پیش رفت میں تیزی آ گئی ہے۔

نیتن یاہو کو سب سے بڑا دھچکا ان کی اہم مذہبی اتحادی جماعت ‘یونائیٹڈ توراہ جوڈازم’ (United Torah Judaism) کے فیصلے سے لگا ہے، جس نے فی الوقت کسی بھی امیدوار کی حمایت سے صاف انکار کر دیا ہے۔ جماعت قدامت پسند الٹرا آرتھوڈوکس طلبہ کو فوج میں لازمی سروس سے استثنیٰ دینے کے قانون کی عدم منظوری پر شدید ناراض ہے۔ یونائیٹڈ توراہ جوڈازم کے نمائندوں نے اسرائیلی صدر اسحاق ہرزوگ کے ساتھ مشاورت کے دوران نیتن یاہو یا کسی دوسرے رہنما کا نام پیش نہیں کیا اور واضح کیا کہ آئندہ کسی بھی حکومت کا حصہ بننا قانونِ استثنیٰ سے مشروط ہوگا۔

دوسری جانب، کنیسٹ میں 11 نشستیں جیتنے والے عرب سیاسی اتحاد ‘جوائنٹ لسٹ’ اور 8 نشستیں حاصل کرنے والی عرب جماعت ‘رام’ (Ra’am) نے ‘یشر’ پارٹی کے سربراہ اور سابق فوجی چیف گادی آئزن کوٹ (Gadi Eisenkot) کی حمایت کا اعلان کر دیا ہے۔ رام کے سربراہ منصور عباس کے مطابق انہوں نے آئزن کوٹ کی حمایت اس لیے کی ہے کیونکہ ان کے پاس مستحکم حکومت بنانے کی عددی اکثریت موجود ہے۔ اس پیش رفت کے بعد گادی آئزن کوٹ کو 120 رکنی کنیسٹ میں 67 ارکان کی واضح اکثریت حاصل ہونے کا امکان ہے، جو حکومت بنانے کے لیے درکار 61 نشستوں کی حد سے کہیں زیادہ ہے